Perú suyupi, fiscal de la nación, Patricia Benavidesmi mana willakuyta munanchu imayna tesisnin qispichisqanta.
Paymi nin : tiqusqam kachkani, agendaymi kichkillaña, manam pacha kapuwanchu nispa.
Universidad Alas Peruanas (UAP) titulonta MAGISTER DOCTORADONTINTA qusqa, mana SUNEDUmanta licenciata kay titulukuna qunanpaq chaskichkaspa.
Kay tesisnin kaq patamanta chaqwanakuypi kachkan. Ñawpaqtam Pedro Castillo, Betssy Cháveztawan chaqwaraku, kunanñataqmi tuparun Patricia Benavides mana.
Paymi mana rimarinchu, upa tukuspami kachkan.
Investigación ruwasqankupiñataqmi mana tarinkuchu, Kay título hurqunanpaq llapan documento churasqanta, manas chikachallanpas kanchu.
Suneduñataqmi michakuchkan Kay titulo kayninta, UAP hatun yachay wasiñataqmi nichkan; chinkarunmi kay tesis qispinanpaq documento churasqan nispan. Kikinkupura pakanakuchkanku.
Manas pipas yachanchu kasqan utaq mana kasqan kay tesis nisqanpa documentokunapa kawsachiyninta. Kaynatam willakamun ATV Wayra wasimanta.
Paykunam ninku:
Manam ima investigación Magister Derecho Civilpi doctoradontin grado hurqunanpaq kanchu.
Iskay wata ñawpaqtaraqmi San Martín hatun yachay wasipi likarqan.
2009 watapiñataqmi UAP kaq patamanta qurqa huk académico doctor grado nisqanta «Principio de Autoridad» tesis nisqawan.
Universidad Alas Peruanas yachay wasipi catedrático juradokunataqmi rimarimunku kaynata:
Manam chay tesistaqa rikuranikuchu haykallapas. Kaytam nimuwanchik Guillermo Quiroz.
Kunan puni Jurado Nacional de Eleccionespi llamkaq tayta Willy Ramírez nin:
Achka tesiskunatam Lima llaqtapi likarqaniku ichaqa kay tesistaqa manam yuyanichu imallantapas.
Kunankama, manam imallapas yachakunchu Patricia Benavides, Fiscal de la Nación umalliqpa tesisninmantaqa.
Tayta Willy Ramírezmi kay tesismanta nin:
Kay tesispa kawsaynin utaq mana kayninmanta yachaqqa; yachay wasi Universidad Alas Peruanasmi kutichikunan nispa.
Paykunapas, UAP hatun yachay wasipa umalliqninpas ñam nimunña manas ima documento ni kaqninpi utaq digitalninpi kanchu, manas maskaspankupas tarinkuchu Patricia Benavidespa sutinpi.
Congresista Susel Paredesmi willamun: Paysi likaspa yachay wasi UAPta mañasqa kay Patricia Benavidespa tesisninpa copianta, chaynallataq investigasqa kay grado hurqunanpaqsi requisito iskay Simi rimaynin, chaytawan willawayku, manam ñuqa tarinichu rispay, chaymi hamkunata oficialmente mañachkaykichik nispan.
Kay Fiscalsi grado nisqanta hurqunman kasqa; yachay wasi Universidad Alas Peruanaspi ichaqa kay yachay wasiqa manam atiparqachu SUNEDUpa licencianman, chay raykum mana qunmanchu ima título nisqanta nitaq grado nisqantapas pimanpas. Sichu kay yachay wasi mana allintachu kutichikunqa, kay uma nanaymanta hinaptinqa wichqarachikunmanmi.
Qillqaq: Ines Acosta
Revisión: Albino Benito