Tawa yupay sábado p’unchawpi, mayo killamanta, tukuy runakuna mancharisqa lluqsirimusqaku, imaraykuchus chay hatun bus metropolitano sutiyuq yarwariyta qallarisqa chay parque del trabajo sutiyuqpi purichkaqtin; runakunaqa qaparispa ima, utqhaylla chay ukhumanta awqakuspa lluqsimurqanku. Kay accidenteqa kinsa pacha sukha kachkaqtin yarwayta qallarimusqa.
Kay parque del trabajo sutichasqaqa tarikun chay avenida Caquetá, San Martin de Porres llaqtapi, kayqa Lima ukhunpi tarikun.
Chay bus ukhupi q’usñi llapan runakunata mancharichispa qatipayusqa, chay runakuna ukhupi wawakuna, irqikuna, wayna sipaskunapas kasqa, llapankuyá utqhaylla awqarisqaku, kay sasachaymanta. Chaypiqa, pikunachus amachanku chay k’ikllukunapi, Policia Nacional paykunayá waq runakunata lluqsiyta yanapasqaku, hinaspapas chay yarwariyta tatichisqaku.
Ichaqa kay runakuna ukhupin pisqa runakuna mana allinchu lluqsisqaku, paykunaqa phawaspa takanayukusqaku hinallataq k’irisqa lluqsisqaku, chayraykun kay Policia Nacional hinallataq Autoridad de Transporte Urbano para Lima y Callao (ATU) umalliqkuna k’uskirichkanku, imayraykus kay bus metropolitano sutiyuq yarwariyta qallarirqan, kaykuna aswanta yacharikunan maypachachus kayqa tukuy runakunaq kawsayninta mana allinman apayuyta atinman.
Imaymana sasachaykuna metropolitano puriyninpi
Kay bus utaq servicio metropolitano sutiyuqqa manan kunanllachu sasachayi tarikuchkan, pikunachus kaypi sapa p’unchaw siqanku llank’anankuman, paykunayá ninku, sasapunis sapa kutin tukuy hatun colakunata ruwananku hinallataq nisyuta suyakunanku kay buspi puririnankupaq chayrayku paykuna mañakunku kay buskuna yapakunanta, manasyá utqhaychu llank’anankunaman chayankuchu.
Kayraykun Marybel Vidal Matos, payqa kay Autoridad de Transporte Urbano para Lima y Callao (ATU) nisqata umallin, payqa nimun, manañas kay fila utaq cola ruwaykuna chay bus ukhupi qanqañachu, aswantaqa waq llank’aykunata purichinqaku allin servicio kananpaq. Kaypis iskay puriyninkunata rutas nisqakunata huñurinqaku, kaywantaq chunka iskayniyuq siqariykuna yapakunqa, kayhinaman aswan utqhayllata runakuna puririnqaku, amaña sasachaykuna kananpaq.
Carrokunaq puriyninmanta umalliq willakuynin – Autoridad de Transporte Urbano para Lima y Callao (ATU) sutiyuq
Kay umalliqkunaqa utqhayllas chay redes sociales ukhunta willarikamusqaku, kaykunamanta tukuy runakunata amachakunanpaq, kaykunawanqa seguro nisqata sapanka runakunapaq churanku hinallataq Cayetano Heredia hampina wasiman apaska kanankupaq. Bomberokuna, Policía Nacional hinallataq ATUpi llank’aqkunawan kuskamanta tukuy runakunata yanapasqaku.
Maymanmi wahananchik kay sasachaykunapi tarikuspa:
Kay sasachaykunapi tarikunki chayqa, utqhaylla mana qullqillapaq wahanayki kay yupaykunaman:
- Cuerpo General de Bomberos Voluntarios del Perú (CGBVP) – 116 yupayman
- Sistema de Atención de Urgencias y mergencias Medicas (SAMU) – 106 yupayman
- Policía Nacional del Perú (PNP) – 105 yupayman
Qillqaq: Helen Quiñones