Congreso ukhumantapacha, ñawpa huk votación yupayninpi aprobamunku huk kamachikuyta, kay kamachikuypi nimunku, utqhaylla umalliq alcaldekuna hinallataq gobernadorkuna waqmanta aqllarisqa kanankupaq, chaymi nikun reelección inmediata nisqa hinaspapas kay musuq kamachikuypiqa nimunku chay movimientos regionales nisqakuna, huch’uy huñunakuykunamanta lluqsirimuranku, chaykunaqa manaña eleccionman haykuyta atinkumanñachu.
Kay votación nisqapiqa pusaq chunka iskayniyuq votayunku kay kamachikuy aprobakunanpaq, ichaqa kay kamachikuyqa waqmanta churarikunan kachkan chay segunda votación nisqaman. Kay votación qallariyninpi, congresista Martha Moyano sutiyuq, payqa umalliq kay comisión de constitución nisqapi, pay kikinmi mana pipas yachasqanta churayamun chay movimientos regionales nisqa manaña eleccionman haykunankupaq.
Kayqa iskay waranqa iskay chunka kinsayuq watapiqa, manan churasqa karanchu kay aprobasqa kamichikuy ukhupiqa, chaymi chay congresista llanqallamanta churayamun mana pi allintaraq yachachkaqtinku, kaytaq mana allinchu, antidemocrática nisqa kanman, imaraykuchus tukuy llaqtakunapi kan chay movimientos regionales, paykunayá kunan manaña derechonku kanmanchu, “ichaqa waqmantachá kaykuna allinta qhawarikunqa” nispan nimun congresista Susel Paredes.
Chaymantapas nimun “kaypiqa iskaykunatan qhawarinanchis, chay reelección nisqaqa, huqta qhawarisun chayqa allinmi, imaraykuchus tawa watapiqa manayá allintachu umalliqkuna llank’ankuman, pisin chay watakunaqa. Hinaspapas, aswan allintan kay qhillqata yacharinanchis, ñá congreso ñawpaqqa chay movimientos distritales nisqakunata chinkachipunkuña, kunanñataq waqmanta kikinta ruwayta munanku chay movimientos regionales nisqakunatapas, yachasqanchismanhinaqa manayá llapan runakunqa chay hatun partidos políticos ukhupiqa kayta munankuchu, chaymi mana allinkuna kachkan”. Chaymi payqa congresoman chay comisión de constitución nisqaman kutiyachiyta munasqa kay qhillqa kamachikuyta allinta qhawarinankupaq, ichaqa mana wasapanchu. chaytawan nimun congresista, Susel Paredes.
Hinallataq congresista Ruth Luque sutiyuq, paypas rimarimun kay kamachikuymanta “Tukuy hatun partidos políticos nisqakunaqa, kay huch’uy movimientos regionaleskunatan chinkachipuyta munanku, manaña paykunawan llalinakuyta munankuñachu, kaykunaqa manan allinchu llaqtakunapaqqa, imaraykuchus chay llaqtamantapacha representación nisqa pisiyapunqa, paykunalla umalliyta munanku, chaymi chay centralización nisqa, kananmi chay diversidad política, tukuy huñunakuykunan eleccionmanqa haykuyunanku, paykunapaqpas kanmi derechonku participación política nisqapi”. Chaytan nimun congresista Ruth Luque. Freddy Vracko, umalliq presidente de la Asociación de Movimientos Regionales del Perú, paypas ancha phiñakuywan rimarimun, “kayqa manapunin allinchu Peru suyunchispaqqa, kaywanqa kay democracia nisqatan sarunchayapuchkanku, hinaspapas traición hinan nuqaykupaq”.
Qillqaq: Helen Quiñones