Cesar Soto, sutiyuqmi haykuyun chay hatun suntur wasi Universidad Nacional de Ingeniería sutiyuqman (UNI) chaypin pay tukuy wayna sipaskunamanta ñawpaqpi llalliyun, paymi haykun chay examen de admisión 2024-II nisqapi, payqa chunka pusaqniyuq watallayuq, Puente Piedra llaqtamanta, Limapi. Payqa ancha allintan chay examen nisqata quyamun, chaypitaq aswan allin qhawarisqa kan, maypachachus chay suntur wasiman haykuyqa ancha sasa.
Kay ancha allin waynaqa, kaypi willakun imakunatan ruwanan karan kaypi llallipananpaq, yachasqanchispashinaqa kaymanqa achkkha wayna sipaskunan haykuyta munanku, chaymi llapanku anchata yachananku, chaymi chayman haykusqanqa ancha kusikuymi.
Cesar Miguel Soto waynaqa, San Agustin yachay wasipi, Puente Piedra tiyasqanpin yachaqamusqa, chaypi kaqtintaq yuyamanayukusqa chay UNI sunturwasiman haykuyta munasqa, killallaraqmi yachay wasinta tukuspan ña examen nisqapi churapakamusqa ichaqa manan yachay wasillatachu risqa, payqa academia Cesar Vallejo sutiyuqmanpas risqa, chaymi p’unchaw p’unchawninpi nichkutapuni yachamusqa, manaña huqkunataqa ruwasqañachu.
Payqa chunka tawayuq watanmanta chay preparación yachayman haykusqa, sapa wata. Chaymantapas willakamun, payqa chunka utaq chunka iskayniyuq pachapi huk p’unchawpi estudionpaq churakusqa, imaymana ruwasqantapas, allinta allicharukuspa tupachinanpaq, hinaqa llapan uman, yuyaynin chay suntur wasi UNI nisqaman haykunanpaq.
Hinaspapas nimun, payqa manas haykuyta utaq llallipayta yachakusqachu, ichaqa sapa kutintaq aswantaraq yachachkasqa chiyqa, pay kikin nikusqa, allinta yachayniypi kallpachakusaq hinamanqa haykusaqpuni nispa.
¿Hayk’atataq Cesar Soto waynari chay examen UNI 2024-II hurququsqari?
Payqa hurququsqa chunka qanchikniyuq wasapayninta (17.248) chaywantaq ñawpapi primer lugar nisqapi llallipan chay carrera de ingeniería industrial yachayman, payqa kimsa examenkunapin churapakamusqa, chay kimsantinpi allinta wasapamusqa.
Hinallataq payqa llapan waynasipaskunatan rimapayamun:
Wayna sipas masiykunata niyman: “allinta ruwanankunata allichanankupaq, may suntur waqsikunaman haykuyta munanku chayqa, allinta yachaqinanku, manan llanqa musphanankuchu mana allinkunata ruwaspa, mayninpiqa waq imaymanakunata ruwayta munanku, mana chayqa allinchu, aswanqa sapa p’unchawmi estudio nisqaman churakunanku, kallpachakunanku ima, kananmi chay disciplina nisqa, yuyayninkupin kanan ch’uya munasqanku, chayllawanmi maymanpas haykuytaqa nuqahina atinqaku. Hinaspapas kananmi huk yanapay, tayta mamakuna, yawar ayllupa yanapayninwanmi kaykunataqa llallikun.
¿Mayqintaq aswan allin carrerari yachaqinapaq suntur UNI ukhupiri kanman?
Kay pachapi ruwakun huk rankin nisqata, hinaspa qhawarikun ima carreras aswan allin yachaqinapaqhina, chaypitaq tarikun: Ing. Civil, Ing. Industrial hinallataq Ing. Sistemas, kay carreras nisqakunan aswan allin hinaspapas kay UNI sunturwasiqa ancha allin riqsisqa, infraestructura nisqanpas aswan allin tecnologiawan churasqa, chaymi tukuy Perú suyumanta allin qhawarisqa. Tukuyunapaqtaq, imaynatachus Cesar Soto Wayna, llalliparan kay examen nisqapi, chayhinatan tukuy wayna sipaskunan ima munasqankuta ruwayta atinkuman, mana imapas sasaqa kanmanchu allinta kallpachakunku chayqa.
Qillqaq: Helen Quiñones