Policia Nacionalqa imaymanata machkhanankupaq ruranku, ichaqa manam chay llank’ayninkunaqa wasapanchu nitaq tariyta atinkuchu.
Kay suqta p’unchaw domingo killapin huk watañan hunt’akunqa Vladimir Cerrón justicitamanta ayqikusqan.
Kay watapi, enero killap puriyninpin policiamantapacha suqta chunka patrulleros kay Grupo Especial Contra el Crimen Organizado (Grecco) sutichasqakunawanmi lliwninpi Vladimir Cerronta machkhamurqanku ichaqa Asia k’uchuhinamanmi purirqanku, kayqa Lima hatun llaqta qulla ladunmanhinapi tarikun, chaypitaq chay condominio Mykonos sutichasqamanmi haykurqanku. Ichaqa mana tarichikunchu.
Kunantaq, teniente general de la Policía Óscar Arriola nimun “Manan chaypiqa kanmanchu karqan” Manan hayk’aqpas chaypiqa pakakunmanchu.
Imaymanata rimaspan, qallumpas watakamunmanhinaraqmi rimamurqan, manan ch’uyatachu yachakun chaypi utaq maypi tarikusqanta, chayhinatan rimamurqan chay Comisión de Fiscalización del Parlamento nisqapi.
Ñawpa ministro del interior Gastón Rodríguezqa, nin imaraykuchus mana kunankama tarisqankumanta chayta, kanmansi huk willaqkuna utaq ñawpaqta yacharuspa Vladimir Cerronqa utqhaylla aswantaraq pakakun.
Hinaspapas nin “Yachakunmi paypa congreso ukhupin khumpakuna kasqanta, paykunan yanapanku, chaymantapas policía kikinpipas kanmanmi willaqkuna, mana chayllachu chay Ministerio Público, utaq Poder Judicial ukhupipas kanmi yanapaq khumpankuna” Chayhinatan Gaston Rodriguez willakun.
Chayta yachakusqanpuwanpas, manañas tariytaqa atinkumanñachu imaraykuchus Vladimir Cerronqa, ña hawa suyumanña lluqsinman karqan.
Rodríguezqa nin, chiqaypuni kay willakuy kanman chayqa, yachakunanmi imaynatas policiakuna llank’arqanku, manan hinallaqa kanmanchu, imaynapitaq chhayna llank’asqankupiri mana hap’iyta atinkumanchu, chayta ch’uyanchananku.
“Willanankun llapan llaqtaman, imatachus ruwachkanku, imaynatachus purichkanku, imakunatas, maykunatas richkanku, llapanta willakunanku, chaywanmi yachakunqa chanintachu hap’inankupaq llank’achkanku icha manachu hinaspapas paykunapi ch’uya kanan, Perú suyupiraqchu tarikun icha hawa suyumanñachu pasapun chayta” nispa nin
“Muyuriqninpin ancha hatunpi amachasqa kachkan”
Hinaspas kay rimayninpi, nimun, yachakunmi Vladimir Cerron allin amachasqa kasqanta, chaymi aswantaraq k’uskinanku, pikunapunin mana hap´iyta atichkankuchu, ñan kimsa pachaq suqta chunka pisqayuq p’unchawña mana tarikusqan, huk wataña.
Chayta rimaspan yuyarichiwanchik, Peru Libre umalliqqa, lliw funcionarios nisqakunamanmi huk manchachikuy willakuyta apachikqa, chaysi manchakuspa wakinkunaqa mana allintachu llank’ayninkuta ruramuchkankuman, hinaspapas chay Dirección Nacional de Inteligencia umalliqpas lluqsichikqañas ichaqa Vladimir Cerronqa mana hap’isqa.
“Imaymana rimaykunan kachkan, chaykunatan k’uskirikuchkan, chaypi rikukuchkan carro presidencial nisqatapas, chay carropiqa gobierno presidentellan purin; wakin rimaqkunaqa ninku, chay carropis Vladimir Cerronqa Perú suyunchikmanta lluqsinman karqan, hinaspapas Cuba suyumantapachas huk aparatos allin yachayniyuqta pay rimananpaqhina qumusqaku, chaywantaq Vladimir Cerronqa wahayta atinman karqan”.
Imakunawanmi policia llank’an
Gastón Rodríguezqa rimamusqan tukuyninpi nimun, policiaqa imaymana yachay ruwaykunawanmi justicimanta ayqikuq runakunata tarinankupaq llank’an. Ñawpaqtaqa inteligencia nisqawanmi llank’anku, chaywanqa tarinkumanmi pitapas, paykunaqa tukuy Perú suyu llaqtakunapi llank’anku.
“Yachasqanchikmanhina policiaqa Lima llaqtapi hinallataq tukuy Perú suyu llaqtankunapi machkhamuspa purimunku, chay yachay ruwaykunata estrategias nisqakunata churamuspa”
Kay p’unchawkunapi, programa Punto Final sutiyuqpi willakamurqan, Policia ruwasqanta, chay condominio Alto Prado nisqapis tarikunman karqan, chayraykun paykuna risqaku utqhaylla, chaytaqa huk periodista willakusqanraykulla. Chaymi ñawpa ministroqa nin, “manan allinchu policiaq ruwasqanqa, manan chay willakuyllawanqa policiaqa purinmanchu, kananmi aswan chanin yachaykuna lluqsinankupaqqa”
“Kanmanpaschá allin llank’asqanku, ichaqa allintan yachananku, allintan allchakunanku, chaninchakunan, ña yachaspaña lluqsinanku. Manayá yachakunchu chayhinamanchus karqan icha manahus, chayhinata llank’anqaku chayqa llank’ayninkuqa mana allin qhawasqan kanqa” Chaytan nimun. Ichaqa, llaqta runahina, aswantaraqmi yacharinanchik Perú suyunchikmanta, manan hinallataqa qhawasunmachu, llapanchik, warmi, qhari, sipaskuna, waynakuna yachananchik tukuy rurakusqanta. Chaymantapas puririnanchikmi, tapurinanchikmi, chaymi derechonchik Perú runahina.
Qillqaq: Helen Quiñones