Pitaq karqa Papa Francisco?
Argentina suyupi paqarimurqa Jorge Mario Bergoglio Sivori sutiyuq, paymi piwi americano Iglesia católica lliw tiqsi muyupi umalliqninchik karqa.
Argentina suyu, Buenos Aires, taksa llaqta Flores sutiyuqpim paqarimurqa 17 puquy raymi killa, 1936 watapi. Paymi italiano tayta Mario Jose Francisco Bergoglio, mama Regina Maria Sivori ayllupa piwi churin.
Taksachanmanta taytachaman iñiytam yachachirqa awkinpiwan Jardin de infantas Instituto Nuestra Señora de la Misericordiapi monjakuna, chaypitaqmi primera comunioninta chaskikurqa.
Tayta mamanwan, turi paninkunawan kuskam comun wasipi común runakuna kasqanku rayku
Yacharqaku, manam paykunaqa apu runakunachu karqaku, ñuqanchik hina llaqta runallam.
Yachay wasi 8 wan sutichasqa Coronel Pedro Casviñopim likarqa, hina hipanmanmi musuchaña
E.N.E.T 22 SUTICHASQA Hipòlito Irigoyenpi likarqa, chaypin técnico químico lluqsirqa. Kaypitaqmi
Fotboltawan basquet pukllarqa.
17 watanman chayaspañataqmi qatirqa vocación sacerdotalta, hinaspan 22 watanpi yaykurqa
Seminario Diocesano de Villa Devoto Jesuitasman, kaypin chaqrukurqa Compañía de Jesusman.
1960 watapim Chile suyuman noviciadon ruwanampaq rirqa, qatiqnin watañataqmi llaqtanman kutirqa Humanidades likaynin tukuq.
Likarqataqmi Filosofiata hina hipanmanñataqmi chaskikurqa Yachay Wasi Maximo de San Miguelpi licenciaturanta teologiapi.
Paymi yacharqa tukuy ima rimaykunata: francés, italiano, inglés, alemán, latín griego rimaykunatawan.
Compañía de Jesuspim yachachirqaku, ordenado, wakcha, kumuyta, chaypitaqmi yacharqa wakcha runa masin kuyayta.
Sacerdotemanmi chayarqa 32 watampi 13 puquy Raymi killa 1959 watapi, chaymantam achka achkata likaspa wichayman puririrqa, mana pitapas kumuykachachispa.
Paymi yachachirqa literatura, psicologiatawan Inmaculada Concepción de Santa Fe, yachay wasipi, chaynallataq El Salvador, yachay wasipi Buenos Airespi. Chaymanmi aparqa Likaq Jorgee LUIs Borgesta taller de LITERATURA gauchesca ruwananpaq.
36 watampim 31 anta sitwa killa, 1973 watapi suqta watakama Provincial cargo umalliq karqa
1986 watapim siqarqa Director Espiritual y Confesor kananpaq Compañía de Jesuspi. Kaypim riqsirqa hinaspam hatu hatun discipulun karqa monseñor Antonio Quarracinomanta. Pay wañukuptin siqarqa mitaqnin.
Papa Juan Pablo II, 20 aymuray killa, 1992 watapi nombrarqa Obispo Titular de Auca hinaspapas Auxiliar de Bueno airestawan.
Llaqtampi, chaynallataq huk law llaqtakunapipas suma sumaqtam apostoladunta qispichirqa, chaymi, Papa Juan Pablo II 21, hatun puquy killa, 2001 watapim Creado Cardenalman titularqa San Roberto Balarminowan sutichaspa.
Tayta Bergoglliom hatu hatun sayaynin karqa Conferencia Episcopal , Argentina suyupi. Kay instituciontam iskay pachata qatinawllata umallirqa, 2005, 2011 watakunapi
Episcopado Latinoamericano 2003 watapi akllarqaku payta Comision Redactora de Documento Final V Conferenciapa ukumpi Aparecida sutiyuq llaqta, Brasil suyupi. Kay conferenciapim qayllas riqsikuyninkuta chayachirqaku yachayniyuq , Taytachaman iñisqan rayku, chaynallataq sumaq umanchsqa doctrina cristiana latinoamericana chuyay chuyay, yakuy yakuchata atipasqan rayku.
PAPA Benedicto XVI, Papa kayninmanta lluqsikusqan qawam 13 punchaw, pawkar waray killa, 2013 watapi Conclavepi cardenal Jorge Bergoglio Papa Sumo Pontifice kanampaq akllarqaku llapa cardenalkuna.
Papa Franciscowan suticharqaku, pay chaskirqa kay sutita, hinaspam qallariyninmanta pacha wañukunan kama llapallan tiqsi muyuta kusirichirqa, sumaq sunqu, kuyapayakuq kasqan rayku.
Paymi wañukun 21 punchaw, ayriway killa, 2025 watapi. Sapa rimayninpi, sapa sermonnimpim mañakuq Ñuqallaypaq Taytachata mañapuwaychik, nispan, Lliwya, makinchikta pitukuykuspa Taytachata mañasun sumaq kusi kawsayman chayananpaq.
Qillqaq: Ines Acosta
Revisión: Albino Benito