Tawa wata Perú suyunchikmanta Bolivianta Italiaman ayqiq Giancarlo Bertini kutirqamun kay chayraq ripuq 3 punchaw qatun puquy killa 2022 watapi, hinaspam nin tukuy yachasqaytam willakusaq nispan.
Lliw kay uma nanay tukunampaqmi Giancarlo Bertini Vivanco empresariopa willakuynin kusallaña. Paymi Perú suyunchikmanta 2018 watapi ayqirqa Bolivia suyunta.
Tawa wata ayqisqan qawam upallalla kikinmanta kutirqamuptinmi ancha ancha mancharisqa Fuerza Popular político partido kachkan, aswan mancharisqam kachkan umalliqnin Keiko Fujimori.
Kay Giancarlo Bertinipa willakuyninmi chiqapta wañurachinman kay partidota sichu fiscaliapi narco tráfico qacha qullqi chaskisqanta kaq punilla willakuykuptin.
Bertini Vivancom kutiramun tukuy yachasqan willakunampaq, yapa mana kaq aportaqkunata 2011 eleccionespi rikurichisqankumanta.
Kay empresariom yanaparqa Jorge Yoshiyamata narco tráfico qacha qullqi taqsasqanta chaninchampi. Chaytas tiyun Jayme Yoshiyama qusqa.
Ministerio Público nisqmpi hinas Bertini Vivanco maskanman kasqa qacha qullqi pakaqta, Odebrechtpa contribución qusqan mana yachakunampaq.
18 huya Raymi killa, 2018 watapi chaypacha warmin Patrizia Coppero del Valle, Fiscal Domingo Pérezman waillakusqan hawa Jorge Yoshiyamas kasqa pim chanin qacha qullqi quq.
Chaymantas chay qacha qullqikunata, mana aportaqkuna kachkaptin, mana kaqkunata maskaspanku Fuerza Popularman qusqaku.
Chaymi, Bertini Vivanco 21 huya raymikilla 2018 watapi ayqirqa Italia suyuman.
Chaynataqmi Coppero nirqa ñuqapa qayllaypim oficinaypi telefonopi Keito Fujimori hayamurqa Jorge Yoshiyamata hinaspam nirqa imaynam campaña kachkan. Celular upallaruptinmi Jorge Yoshiyama qusaymanwan willawarqaku uma nanasqam kachkan kay campaña rayku nispan, chaymantam yanapawaychik nispa mañakusqantapas willawarqaku.
Hayllasña lliw yacharuptinkum 12 aya marka killa 2018 watapi ancha llakisqallaña Jorge Yoshiyama Fiscal Domingo Perezpa hayllampi nirqa ari chiqapmi Giancarlo Bertini qacha qullqipa recaudadornin karqa nispan.
Tiyuy Jaime Yoshiyamam niwarqa kachkanchu qullqiyuq atilnikikuna, paykunapa sutimpi kay qacha qullqita Fuerza popularpa campañanman qunapaq nispan.
Paytaqmi niwarqa kachkanmi achka qullqi kay Fuerza Popular campañampaq empresariokunapa quwasqan ichaqa manam sutinku rikurinanta munankuchu nispan.
Chaymi Giancarlos Bertinipi hamutarqani qullqisapaman rikchakuptin.
Paywan rimaptiymi niwarqa manam atilkunata nitaq ayllukunata tariymanchu, ancha sasallañam tariynin nispan Jorge Yoshiyama Fiscal Perezman nirqa.
Jorge Yoshiyamam willakurqataq paysi Giancarlos Bertiniman qusqa Odebrecht brasileña empresapa qullqi qusqanta.
Keiko Fujimoripa defensanñataqmi nin Achka kutiñam Jorge Yoshiyama llullakun.
Kunan Giancarlo Bertinipa willakuyninwanqa Jorge Yoshiyamapa willakusqanqa aswantam
Chiqapchakun.
Qallariyninchu icha puchukayninchu Fuerza Popularpaq chayaramun Bertinipa kutimuyninwan. Lliwmi sunqunmanta pacha mancharisqa katkatatachkanku.
Qillqaq: Ines Acosta