República wayra wasinta willakamusqan hinan kay Puno llaqtapi, sapa wata sumaqllata Raymin ruwakun. Chaypim achka achka quñunakuykuna watantinpi awyanakunku atipanakuypi llallinakunankupaq.
Kunan 2024 watapipas Puno llaqtam chaskirqa achkallay achka watukuqkunata, chaynallataq huk law suyuyuq turistakunatapas.
Kikllun kikllun tusustin, takistin, llipipipiq pachakunawan pachakuykuspankum llallinakuypi tusurqaku, llapachallan turistakunapa kuyakuyniyta maskaspanku.
Kay ripuq intichaw 11 hatun puquy killapim Punopa estadio Enrique Torres Balónpi achikyaywan kuska llapa tusuqkuna quñunakurqaku, paykunam Kay 11, 12, 13 punchawkunapis willakusqankupi hinas kanman kasqa 120,000 tusuq ayllukuna.
Paykunam, tususpanku llapallan tiqsi muyuman yachachin; ñawpa ñawpamanta pacha yachayninkuta, chaynallataq Mamacha Candelariaman iñiyninkutapas, chay raykum atipanakuypi llallinakunku.
Kay 2024 watapis qayakusqaku 80,000 tusuqkunata.
Kay haut hatun raymipi tukusqan hawam lluqsimun pikunam atipanakuypi llalliqkunata, chaytañataqmi ñuqa hamkunaman willamuchkaykichik :
Comparsa 75 Morenada Laykakota sutiyuqmi llapallanta llallirun 63. 14 tupuyman chayaruspa.
Hina qipallanman Asociación Folklórica Morenada Bellavista, 62.71 puwan.
Kimsa kaqpim kachkan Asociación Cultural Caporales Centro Poderosa y espectacular, 62.70 tupuwan.
Kay sumaqllataña Puno llaqta Raymichan sapa wata allin puriyninwan siqarichun, waytarichun, tiqsi muyupi riqsisqa, kuyasqa kananpaq.
Kay atipanakuypi kachkan 2 tupykuypi. Hukmi chayan 70%man kaymi chuta chuta tusuyniyuq, manaña tukuq, maypim llapa tusuqkuna rikuqninkunapa sunqunman chayta munasqanku tusunku, takinku Hinaspapas churakunku sumaqllataña llipipipiq pachakunawan.
30% calificacionñataqmi kachkan imaynam Mamacha Candelariaman kuyakuyninkuta, iñiyninkuta chayachisqan rayku.
Kunan 2024 watapim, tusuqkuna manaraq tusuyta qallarichkaspa chiqapman qispichinku qayna wata wañuq llaqtamasinkunaman, paykunam qaparispa, likaspa utaq wifalankuta lutuwan huqarispanku manaña kutimuq almakunaman kuyakuyninkuta chayachinku, hinaspapas kirillakunku Perú suyu umalliqkunamanta. Chaypis huk allin sunqu hampiqpas wañusqa kirisqakunata, hampichkaspa, yanapachkaspa. Manas Puno llaqta qunqanchu ayllu masinkupa wañuyninta, yawarninsi llaqtankupi chaqchusqa justiciata suyallachkanku.
Qillqaq: Ines Acosta
Revisión: Albino Benito