Ñawpa pachakunamantaraqmi kay hatun raymi aparikun, may waq suyukunamanta runakuna ch’usarimunku Tayta Intiq p’unchawninman, chaymi kunan watapas munayta puririchikurqan kay Qhapaq Inti Raymita.
Kay iskay chunka tawayuq p’unchawtan, inti raymi killapi, tukuy runakunan Qusqu llaqtaman puririmurqanku, imaraykuchus sapa watahina Tayta Intinchikta kuska añanchayukunanchikpaq.
Tutamantapacha llapa runakuna, irqikuna, waynakuna, sipaskuna, warmikuna, qharikuna, pikunachus ruwarinku kay Inti Raymita (elenco artístico) nisqa, puririmurqayku Qurikancha pataman, raymiqa, chaypiyá qallarin kay hatunkaray p’unchaw, chaypitaq p’achakuyku, alchakuyku, ñaqch’akuyku ima; hawapitaq achkka runakuna tukuy tiqsimuyumanta suyakuchkanqarku, nuqayku haykunaykuta.
Chay Qurikancha ukhupitaq, llapayku kallpachayukuspa, saminchayukuspa lluqsirimurqayku.
Quri kanchapi:
Kaypiqa pisi pisimanta lluqsirimunku tawantin suyukuna, antisuyu, kuntisuyu, chinchaysuyu hinallataq qullasuyu, paykuna munayta tusurinku, imaymama riqch’akuq llimp’ikunata ruwarinku, chay patamantaq lluqsirimun Sapan Inka hinallataq Mama Quya, iskayninku kuska lluqsirimunku, Sapan Inkaqa munayta rimarimun, Tayta Intita añanchayukuspa, chaymantapas Mama Quya rimarimun, tayta Intinchikmanta mañarikuspa, hinaspapas takiyuspa, chayta tukuspataqmi Waqaypataman puririyku, chaypipas tukuy achkkha runakuna suyakuchkarqanku.
Waqaypatapi (plaza mayor):
Kaypiqa kikillantataq pisi pisimanta, tawantinsuyu hankurinku, chaymantataq hatun umalliqkuna, séquito sutichasqa, chaypiyá taririkunku Sapan Inka, Mama Quya, Willaq Umu,Tukuy Rikuq, Mamakunas, Wilkaninas, Khipukamayuq, Hamayt’akuna, Tarpuntay, Sinchi, huqkunapuwan.
Chaypiqa, Waqaypata chawpiman Sapan Inka wicharparin, chaymantapacha kallpawan rimarimun, hinallataq Qusqu llaqta umalliqman khiputa makinman churarin, chaywan allinta umallinanpaq, hinallamantaq Mama Quyapas munayta takirin, chaymantaqa llapayku plazamanta lluqsiripuyku purispa carrokunaman siqanaykupaq Wilka Saksaywamankama.
Wilka Saksaywamanpi:
Kaypiqa Wilka Saksaywaman patanta llapayku wichariyku, qhipanta haykunaykupaq, runakunaqa ña hunt’aña tiyanakupi suyakuchkarqanku, wakinkunataq qaqapatakunapi tiyakuchkarqanku. Chay tiyanakunaqa achkha qulqipaqmi, aswantaqa hawa suyu runakunallan rantinku, Qusqu runakunaqa pisillata, karumanta qhawamunku, chaymi Aswan llakikuy nuqapaq.
Hinaqa, waqmanta tawantinsuyukuna haykurinku Saksaywaman chawpiman, chay chawpipitaq Usñu tarikun Sapan Inka wichananpaq.
Ñawpaqtaqa qallarikun Sapan Inka, Tayta Intipaq napaykuyninwan, chaymantataq Mama Quyawan kuska, Wilka Aqhata haywarikunku, qatiyninmantaq, Wilka Ninata hap’ichinku llapan llaqtakunata saminchanankupaq, hinamantaq Wilka Sankhuta Haywarikunku mana muchuy utaq yarqay kananpaq, tukuyukunanpaqtaq, huk munay akllasqa uywa llamata ñak’arparinku, yawarnintataq Tayta Intiman haywarikunku, tukuyuspataq llapan ayllukuna llaqtakuna q’uchurikunku. Kayhinatan kay Qhapaq Inti Raymi sapa wata aparikun, nuqamantaqa achkharaqmi kallpachaña kachkan, aswantaraqmi hunt’apayukunman, ichapas munayman Kikin ayllu runakuna Inti Rayminchikta aparinankupaq, yachasqanchikmanhina, kawsachkanraqmi yachayninchikkuna, ruwayninchikkuna. Kay Qhapaq Inti Raymiqa manan hawa suyu runakunallapaqchu ruwakunan (turistas) aswanqa ruwarikuran ayllu runakunapaq, llaqtanchikkunapaq, wawakunapaq, wayna sipaskunapaq chaywanmi aswantaqa yachayninchikkunata kawsarichisunman wiñaypaq.
Qillqaq: Helen Quiñones