Julio killapin, kay Ministerio de Transportes y Comunicaciones ukhumantapacha, umalliq wiraqucha ministro Perez Reyes, makinmantapacha kay ayllukunaman Yanacona, Ayllupongo hinallataq Racchi Aylluman, chay qullqita apamun, imaraykuchus chay qullqiwan imaymana ayllupaq ruwayninkunapaq churakunqa.
Kay qullqi ayllukunapaq quyqa, ñawpaqmantaraqmi kay MTC nisqamanta karqan, chaymi kunan julio killapi chay compromiso nisqa hunt’akuchkan, tukuy ayllukuna chay proyecto aeropuerto internacional ruwakunan muyuriyninpi tarikusqankupaq, chaymi “comunidadades de influencia directa” sutichasqa. Chaypitaq ministro Raul Perez Reyes, makinmantapuni S/3.3 hunu qullqi wasapayninta qun, huq cheque nisqapi; chay kimsantin aylluq umalliqkunaman (Yanacona, Ayllupongo hinallataq Racchi ayllu).
Chaymi wiraqucha ministro, ceremonia ukhupi llapan ayllu umalliqkunata nispa nin, “kunanqa chay qullqiwanqa qankunan aswantaraq llank’arinaykichis, maypachachus, qankunamantaña tukuy ruwaykuna aylluykichispaq aswan allinman kawsayniykichiskuna chayarinanpaq”
Kay tukuy qullqiqa kimsantin ayllupaqmi allin kikillanta sapankapaq tupachisqa, chaymi kimsantin ayllu umalliqkuna chaskinkumanhina chaskirikunku cheque simbólico nisqapi, kay qullqiwanqa paykuna allinman ayllunkunata puririchinanku, chaypiyá umalliqkuna kanku: Inocencio Quispe, Wilfredo Quispe hinallataq Estanislao Mamani.
Ayllupongo hinallataq Yanacona ayllukunaqa, chay qullqiwanqa hatun qhatunatas paqarichinqaku, chaypitaq artesanías, awasqankunta, ayllupi ruwasqankuta ima qhatunqaku. Yanacona ayllupitaq aswan wayk’usqa mihunakunata qhatunankupaq wasita paqarichinqaku hinallataq chaypi imayamana huñunakuyninkunata aparinankupaq.
Racchi ayllu, Huayllabamba llaqtapi tarikun, kay ayllupiqa chay qullqita churarinqaku ch’uya unuta hallp’a ukhupachamanta urqunankupaq, imaraykuchus unuqa aswan allin tukuy kawsaypaq, chaymi paykuna chayta ruwarinqaku. Hinaspapas chay unuqa ch’akiypachapaq kanqa. Kay hatun karay p’unchaypi, ceremonia nisqapi, waq umalliqkunapas karqanku, karqan Viceministro de Transportes Ismael Sutta hinallataq Director General de Aeronautica Civil, Donald Castillo waqkunapuwan. Kayhinatan kay MTC, ukhumantapacha llank’ayninta churarimun kay kimsantin ayllukunapaq pikunachus tarikunku chay área de influencia directa nisqapi, imaraykuchus chay muyuriqninpi ruwarikunqa aeropuerto internacional de Chinchero sutichasqa. Kay qullqiwanqa ayllukuna chikallantapas allin kawsayman, aswan proyectokunawan, hinaspapas tukuy kawsayninkunata allinta kallpachanqaku.
Qillqaq: Helen Quiñones