Kay ripuq 1 qapaq sitwa killa 2022 watapim, chay Congresopi llamkaq warmi kirillakamun, kay nimspa willakuynin:
Llamkanayku Jr. Azangaro oficinapim sapa punchaq ruwayniykuta, kay ripuq 27 anta sitwa killa 2022 wata tutanpi llamkarqaniku, chaypim traquta upyachkarqaniku llamkastin. Mana musyakusqaypiñataqmi umalliqniy APP, congresista Freddy Díaz Monago, qachacharuwasqa, chaymi kunan justiciata mañakuchkani, kay congresista huchallikusqanmanta pagananpaq. Kay willakuymi lluqsimun RPP, chaynallataq Comercio noticiakunapi.
Kay willakuymantam kimsa qatiqnin Congreso Vice presidenten Somos Perúpa congresistan, Wilmar Elera kaynata nimurqan:
Kay nisqanku, Freddy Díazpa llamkapuqnin warmita allquchaspan hapirqusqanqa, sapachan warmi llapa qarikunapa chawpinpi llamkasqan raykum, hinaspapas llamkachkaspanku rahu upiyasqanku raykum, nispan nimurqan.
Kay rimasqanta uyarispankum lliw Perú suyu runakuna, llapanku sunqu nanasqa rimarimunku imaynataq; llapa umalliqninchik kaynataqa rimarimunmanku nispa. Imataq warmiqa kanchik mana congresistanchikunapas sumaq ñawinwan rikuwananchikpaq, kaykunachu Perú suyu taytanchikuna kanku. Atatalláw, tiqsi muyuriqpim kay willakuy puririchkan, llaqtanchikpa pinqaynin.
Kay runakuna pinqasqan raykum, congresista Wilmar Elera rimarisqanta uqarispa pampachayta mañakuchkan.
Allquchaspa hapiq congresista Freddy Díaz Monagoñataqmi, tawa punchaw pakakurusqan hawa, chayraq abogadonwan kuska Ministerio Publicoman yaykun, hinaspam nin manam ñuqaqa kay oficinaypi llamkaq warmitaqa imanarqanichu, mana huchayuq kaspaymi hamuchkani Ministerio Publicoman nispan.
Ichaqa imanasqam 4 punchaw pakakurqanki, hinaspa chayllaraq rikurimunki nispa tapuptinkum kutichikun, manam pipas imatapas niwarqachu, nitaqmi anchuykamuranichu feriado punchawkuna kasqan rayku nispan nin. Mana punim kay Perú suyunchikpa taytankuna kay hatu hatun abusukunata llaqta runakunaman ruwawachwanchu. Chaymi huk similla wakin umalliqninchikunata justiciata mañakuchkaniku, sichu paykuna kaynata kumuykachaqchiwasun hinaptinqa imatataq suyachwan wakin yana sunqu runakunamanta.
Qillqaq: Ines Acosta.
Revisión: Albino Benito.