Perú suyunchikpa sumaq killanpim, llakisqa kachkaptinchik huk Huancayo llaqtayuq suma sumaq sipascha iskay kutikama Oregón Mundialpi llapachallan chaskikunata atiparun tukuy tiqsi muyupi, hinaspam chaskin quri qiruta, Perú suyunchikta wicha wichayman quqarispan. Kay kuyapa sipaschapa sutinmi Kimberly García.
Paymi 28 watanpi kachkan, puksuchanmanta pachas hamutasqa chaskiman iñispa Perú suyunchikta wichayman apayninta, chaymi huk simana atipasqantaraq ña piwi quri qiruta 20 kilometro kallpasqanpi atiparqa. Hina kay Oregon Mundialpi kaq patamanta kunanqa 35 kilometropiña karqa, chaymi kikin Kimberly García willakun:
Kaq patamanta kay 35 kilómetrospi chaski kanaypaqmi suma sumaqta akllasqa sumaq balanceada mikuyta mikurqani, achka achkatam llamkarqani samay nitaq pisipayniy kanampaq, chaymi kaq punilla Perú suyuypaq churani kay QURI QIRUTA. Ancha ancha kusisqam kachkani, uchuychaymanta hamutasqay kunan qispichisqaymanta. Chaymi llapa perú suyunchikpi warmakunata nini, ama puni hamutaynikichikta wañuchiychikchu, ñakaristinpas, allpata aspistinpas munaspaqa chayasunmi sunqunchikpa mañakusqanman.
Chaynallataqmi mañakuni Perú suyu umalliqkunata, ama sapallanchikta saqiwananchikpaq,
yuyamanarikuspa yanapawananchikpaq, ima tarisqanchiktapas ñuqanchikqa tukuy sunqunchikwanmi llaqtanchikpaq apamunchik nispan.
¿Pitaq Kimberly García?
Payqa huancaínam, 3200 msnm paqarimuq, chay llaqtanpim oxigenopas pisilla, ichaq sunqunpa kamachisqantam ruwarqa warmachanmanta pacha. Paysi allin kikin kamachiyniyuq warmacha kasqa, llaqtanchikpa sumaq mikuy tarpusqankutas mikuq, sapa punchaw kallpanchananpaq, samariq, puñuykuq kallpan kaq patamanta kananpaq.
Paymi piwi tukuy latino americanukunapa mana atipasqanta atiparun, hina qipanmanmi podio nisqankuman chayarqaqku:
Katarzyna Zdzieblo, polaca chaski, apan qullqi qiruta.
Shijie Qieyang, Chinachaski, titi qiruta. Hinaspapas allinpim hipanku
Raquel González, española chaski, pichqantin puestopi.
Laura García Caro, española chaskiñataqmi, suqtantin puestopi chayan. Ima allinraq kanman kay huancaína llaqtamasinchikta qatipakuspa kunan kawsay warmanchikunapas quri, qullqi, utaq titi qiruta Perú suyunchikman apamunmanku.
Qillqaq: Ines Acosta.
Revisión: Albino Benito.