Muñekita Milly sutichasqan karan ñañanchik Flor Sheiza Quispe Sucapuca, payqa huch’uyninmantapacha, takiqman riqch’akuran, pisqa watayuqllaraqmi huq llallinakuypi churapakuran, kay llallinakuyqa karan tukuy llaqtanmanta takiqkunapaq, kayqa mast’arikuran Yanahuaya llaqtanpi, Sandia wananipi, Puno hatun llaqtamanta, chaypi Fresialinda takiq “No me caso” takinta takispa llalliran, chaymantapachan taytan Jaime Quispe hinallataq turan Oliver Jaime, kuskamantapacha yanaparanku aswan allin takiq kananpaq, paykunaqa yawar aylluhina, Muñekita Milly takiyninta q’imiriranku, purichiranki ima, chaymantapacha, tukuy llaqtakunapi takinkunawan siqayuranku, hinaspapas wakin takiqkunamanta takinta takispan puriran, kunkanqa munay munaytan uyarikuran.
Chaymantapacha, taytan paywan kuska puriq karan, manager nisqa, turantaq tecladista karan, turanqa allinta takiq kasqanta mat’ipayuran, kallpacharan ima, payqa achkkha takikunata qillqasqa panan Muñekita Milly takinanpaq, chay takikunaqa allin chaskirisqa karan, “Ojitos hechiceros”, “Busca otro amor” hinallataq “Maldito destino” kay takikunawanmi allinta llank’aranku, chaymi Muñekita Millyqa allin riqsisqa tukuy llaqtakunapi karan.
Muñekita Millyqa casarasqa karan Wilfredo Quispe Gasparwan, paykunaqa huk wawayuq kanku, chay wawachaqa, huk wata tawa killayuq, chaymi qusan ancha sunqu nanaywan kunan tarikun, imaraykuchus pay wawanwan kuska sapanku qhipakapunku.
Iskay chunka qanchikniyuq p’unchaw, marzo killapin payqa puririsqa Lima llaqtaman, chaypin clínica nisqaman risqa, chaypitaq doctor Víctor Barriga Fong chaskiran, maypachachus payqa aswan allin qhawarikuyta munaspa, huq operación nisqata ruwachikuran, imaraykuchus chay doctorqa allin riqsisqa karqan, chaymi chay liposucción nisqata ruwachikuran. Chay ruwasqanpi chay doctor mana allintachu operasqa, chaymi negligencia médica nisqa, chayraykutaq Muñekita Milly wañupun. Kunanqa investigación nisqakunatan ruwarichkanku hinallataq doctorqa denunciasqañan tarikun hinaspapas chay clínica nisqaqa wisq’asqaña kapun.
Muñekita Millyqa, ancha riqsisqañan takiqhina karqan, chaymi wañunan patapi achkha runa Puno llaqtamanta hinallataq huq llaqtakunamanta hinaspapaa takiq masinkuna waqayurqanku, paykunaqa justicia nisqatan mañakunku, manan hinallaqa wañuynin kanmanchu, tukuy llaqtan rimarimunku, aswantaqa yawar ayllun, taytan, maman, qusan, wawachanpas. Chaymi, kunan p’unchaykuna takinkunapas aswantaraq uyarikuchkan, tukuy raymikunapi takinkuna sunqunmantapacha ruwasqan, takisqan, aswan kallpayuq uyarikun.
Qillqaq: Helen Quiñones