Ancha, ancha riqsisqa, kuyasqa Tongonchikmi, kay ripuq 10 punchaw hatun puquy Killapio, 2023 watapi saqiruwanchik wiñaypaq.
Kay Huancayo llaqtayuq tayta Abelardo Gutiérrez Alanyam, TONGOwan sutichasqa, taksachanmanta pacha takiman iñisqa wiñarqa. Paymi yachay wasipi piwi presentacióninta ruwarqa llaqtanpa iglesianpi corota takispan.
Wiñaruspanñataqmi kikinpa orquestanta qispichirqa “TONGO y su grupo Imaginación” sutiyuqta.
Chay takistin purisqampim riqsirqa kuyay yanan Gladys Lupinta, takiq masinta. Paywan casarakuruspam 7 churikunata unancharqaku, paykunam llapanku profesional allin kawsaypi tarikunku.
Tongom, riqsisqa, kuyasqa Kay perú suyunchikpi karqa, sumaq takichakunata qispichirqa, sapa uyarispam asiywan wañuq kanchik chay “PITUKA”, “SUFRE PERUANO” huk tankunawanpas.
Paymi Jayme Baylypa masichan karqa chaymi “Francotirador” programapi riqsichuwarqanchik, chaypim PITUKA sutiyuq takichanta uyarichiwarqanchik. Chaypitaqmi kay Jayme Bayly tayta nirqa; kay takichaykita inglesman tikraruy nispa.
Tongom, mana imata manchakuq arí nispan munasqanman mana inglesta yachachkaspa munayninwan tikrarurqa asiyllapaqtaña, chaypim qispin “Tonglis” watankuna.
Piwi takichanmi karqa ” No seas mala” sutiyuq, grupo Kiwishowpi lluqsirqa riqsichikuq.
Achkam unanchasqan takinkuna, “La Cantina”, “PITUKA”, “No seas mala”,”Take on me”, huk kuna piwan.
Ruwarqataqmi achka achka covers nisqankunata. Yuyachkaniraqmi wakillantapas:
“Dynamite” BTS nisqanqa
“Poketongo” Pokemón nisqanta.
“Hotel California” The Eagles nisqanta
“Take on me” Aha, huk kuna tawan.
Sumaq kawsaytam aparqa warminwan, churinkunawan, sumaq ñanintam aparqa, chaymi kunan sunqu nanasqa ripuq qusanta, taytanta yupaychanku.
Tongom, unayña ñakarirqa insuficiencia renal unquywan, hina qipanmanmi diabetes unquy ñakarichirqa. Puchukayninpaqñataqmi cáncer unquy wañukunankama ñakarichirqa.
Paymi hospital Arzobispo Loaysapi unqurqa.
Kay ripuq chunka punchaw hatun puquy Killa, 2023 watapi wañukurullarqan.
Kunanqa ñam samaykunña tukuy nanayninkunamanta, hanaq pachapiñam Taytachanchikpaq takipuchkan, Kay llaki sunquntam kusirichichkan. Ancha kuyasqa, ancha riqsisqa TONGO, tayta Abelardo Gutiérrez Alanya, amaya qunqawankikuchu, qamqa ñawpayllam ñawpawachkankiku, qipaykitachá ñuqaykupas paqarin utaq mincha puririmuchkasaqku, chaykamayá sumaqllata Taytanchikpa waqtachampi samapuwayku. Chaykamañayá.
Qillqaq: Ines Acosta.
Revisión: Albino Benito.