Iskay pachaq tawa chunka kimsayuq watatañan puririnchik Perú suyunchikpaq qispiriyninta qatipaspa, chaymi kay k’uychichaw tawa p’unchaw ayamarca killapi, Qusqu llaqtamantapacha, tukuy kallpawan Tupac Amaru taytanchista, Micaela Bastidas mamanchikta hinallataq Tomasa T’ito ñañanchikta waqmanta nuqaykuq kurkuykupi, sunquykupi aparimuspa, tukuy runakunata riqch’arichiyku kallpachakunankupaq.
Kay hatunkaray p’unchawpiqa yuyarikun kay hatun sayariyta, tukuy América Latina suyukunapin riqsirisqa kan, hinallataq tukuy Perú suyuq llaqtakunapi kay p’unchawta yuyarinku imaraykuchus nisyu sarunchay, k’irinchay Pachamamaq ñawpa wawankunapaq karan. Kay España suyumanta chayamuqkunan tukuy ayllunchikkunaq, llaqtanchikkunaq patanpi sarunchasyuspa churarikuranku.
Chaymi, kaykunata yuyarispa ruwarikuran kay teatralización nisqata, kaypin taririkuran Tupac Amarú II, Micaela Bastidas Phuyuqhawa hinallataq Tomasa T’itoq sunqunmantapacha rimarispa, imaynatachus paykuna wañuranku llaqtanchikkunarayku, amaña kay sarunchay kananpaq, chaymi achkkha p’unchawkunapi actores nisqakuna llank’ariranku paykunahina kanankupaq, chaymi huq yachana wasipi hamut’amuchkanku “Casa de Cartón” sutichasqapi; chaymantapachayá paykuna hatarimunku kallpawan, qapariyninkupitaq ninku: “Tupac Amaruqa manan wañunchu, Tupác Amaruqa kawsachkanmi, llapanchikmi kanchik Tupac Amaru” nispa.
Kay rimaykunaqa tukuy yuyaykunapin kanan, wawakunaq yuyayninpi, wayna sipaskuna yuyayninpi, kuraq runakunaq yuyayninpi, chaywanmi aswanta tukuy Peru suyunchik qispirichiyta atisunchik.
Chaymantapas kay teatralización nisqapiqa, aswanta rikurichikun Micaela Bastidas kallpanta, yuyayninta, imaynatachus pay warmi kayninpi puriran Tupac Amaruwan kuska, tukuy ayllukunata, llaqtakunata sayarichikpa, warmimasinkunata kallpachaspa hinallataq rikurikun imaynatan tukuy yawar ayllunta qusantawan ima, pay qhawachkaqtin wañuchikqankuta.
Ichaqa chay p’unchawmantapachan paykunaq wañuyninwanyá kay tukuy sasachaykuna, sarunchaykuna, k’irinchaykuna tukukapuran, kunan pachakunapi ñawpa runakuna ayllukunapi kawsaq runakuna qispirisqa kanku, ichaqa manaraqmi hunt’asqachu nitaq ch’ilachu kay qispiriy, chaymi aswantaraq yacharinanchik, k’uskirinanchik, rimarinnachik, sayarinanchik ima.
Kay mast’ariyqa aparikuran kay Plaza Tupac Amaru sunqunpi hinallataq Municipalidad Distrital de Wanchaq q’imiriyninwan chaymantapas llaqta umalliqkunaq saminninwan.
Director: Juvenal Quispe Escobedo – director de la casa de artes escénicas “Casa de Papel”
Túpac Amaru: Edwin Huayllapuma
Micaela Bastidas: Helen Quiñones Loaiza
Tomasa T’ito: Libia Madeleine Gozales Ccama José Antonio Arreche: Carlos Adrián Olivera Riveros
Qillqaq: Helen Quiñones