Runa siminchikqa hatun ñannintan puririchkan hinaspapas hatun hawa suyukunapi hatun ñanakunpiñan qispirimuchkan, chayraykun mana rimayllamantachu rimana ichapas kawsayninchikkunamanta rimana.
Kunan p’unchawkunan ancha allin willakuykunata chaskirinchik kay Perú suyunchikpi, nuqanchikpaqyá kay hatun karay riqsichikuykuna chayarparimun imaraykuchus, kay cine ruwaypi, cine wakirichiypi, llalliyamuchkanchik kay suyunchikpi hinallataq hawa suyukunapi.
Ñawpaqtaqa rimarisun kay Festival de Cine de Lima 2022 sutichasqamanta, chaypiyá kay munay película nisqa llallinparimurqan, kay ancha munay peliculaqa “Willaq pirqa” llaqtaymanta cine sutiyuqmi, chaypiyá llallipakamurqan tukuy waq peliculakunawan, Willaq pirqaqa aswan allin tukuy Perú suyumanta película kasqa.
Kay películaqa runa simillapi hinaspapas tukuy salas de cine nisqakunapi qhawarikuran, chaymanyá runakuna hunt’a hunt’araq kay película qhawariq puriranku. Kay peliculapiqa aswanta kawsaynintahina qhawarichik karan wawallaraq kaspa turachanchik Víctor Manuel Acurio hinallataq kay película puririchik, wakirichik karan turanchik César Galindo, chaypiyá llalliyamurqanku kay iskay chunka suqtayuq festival yupayninpi.
Hinallataq ancha kusikuywanmi rimarisun kay película Perú suyunchikpi ruwakusqanmanta, kaypiyá chunka hukniyuq p’unchawpi aparikuran kay 38 Festival de Mar del Plata 2023 sutichasqa, kayqa Argentina suyupi, chaypiyá mana hayk’aq rikukusqanta película KINRA llalliyamun tukuy hawa suyukuna peliculakunata, chaymi kunan tukuy tiqsimuyunpi riqrichikamun kay ancha munay peliculata.
Kaypiqa aswanta llank’arimusqa turanchik Marco Panatonic, payqa cineasta Qosqo llantamanta hinallataq payyá masinkunawan kuska purichikqaku kay película llank’ayta.
Payqa kay llallinakuy qispiriyninpi allinta rimarimurqan, payqa nimun “kay peliculataqa manan sapallaychu ruwamurani, achkkha khumpaykunawanmi llank’arimurayku, chaypiyá nuqayku chiqaq kawsayninchikunata qhawarichimuyta munarayku, imaynatachuk nuqanchik ayllunchikkunamanta lluqsimuspa hawa hatun llaqtakunaman siqayunchik, chaykunata kikinta kay peliculapi qhawarichiyku” Hinaspapas payqa nimun, kay riqchikuyqa premio nisqaqa churarikun llapan protesta sayariypi wañusqakunapaqmi, paykuyá kay kawsaykunta kawsariranku, chaymi aswan kallpayuq payqa rimarimuran hinallataq anchata añanchakuran mamanta, Chumbivilcas llaqtanta, Qosqo llaqtanta.
Kay peliculaqa manaraqmi salas de cina nisqapiraqchu, chayraqchá haykurimunqa, chanmanñachá utqhaylla puririna kanqa kay pelicula KINRA qhawariq. Kay hinatan ancha allintapuni turanchikkuna ñañanchikkuna películakunata runa siminchikpi wakiruchichkanku ichaqa manan kaykunallachu kachkan, ñan ñanpila waq peliculakuna runa siminchikpi llank’arikamuchkan hinaqa suyakunanchik kanqa.
Qillqaq: Helen Quiñones