Ruth Bárcena hinallataq Hilaria Ayme, kikinkumantapacha mana manchakuspa, fiscalía nisqaman puririnku abogadonkunawan kuska, ichaqa paykunaqa kay puriyninkunapi justicia nisqata mañakunku, maypichus gobiernomantapacha yawar ayllunkunamanta wañuchipuranku.
Yachasqanchikmanhina, Dina Boluarteqa Ayakuchu llaqtaman riran, chaypitaq manan rimayllatapas nitaq tapukuykunatapas kutichiyta munanchu llaqtaq sayariyninkunapi runakuna wañuchikqankumanta ichaqa Ayakuchumanta ñañanchikkuna, Ruth Bárcena Loayza hinallataq Hilaria Ayme Gutiérrez, qhilqa escrito nisqata churachimunku kay Ministerio Público nisqaman, imaraykuchuk paykuna achhuyuranku Dina Boluarteq ladunman imaymanakunata k’amiyuspa, maypachachus sapanqaqmanta, qusanta hinallataq wawanta gobiernonmantapacha wañuchipuranku.
Ruth Bárcena Loayza, pay kikinpuni Ministerio Público Ayacuchoman rin, abogadonkunawan Yuri Martínez Ochoa hinallataq Jesús Llallahui Salvatierrawan kuska. Payqa huk qhilqa escrito nisqata churamun, chaypitaq nin: “Chay investigación nisqapi, nuqata churawanchkanku Dina Boluarte achhuyusqaymanta, chay comisión del delito nisqapi, ima delito nisqatapas ruwaymanhinaraq, chaymi kunan derechoyuq kaspay, nuqa kikiymanta kayman hamuchkani”.
Chay video qhawakusqanpi, rikukun ñañanchik Ruth Bárcena Loayzata, Dina Boluarte achhuyusqanta, imaymanata qaparispa imaraykuchus qusanta Leonardo Hanncco Chaccata wañuchipuranku chunka pisqayuq p’unchaw qhapaq raymi killapi (15/12/2022), payqa wiksanpi balayusqa wañupuran.
Hinallataq chay videopi rikukun ñañanchik Hilaria Aymé Gutiérrezta achhuyusqanta, paypaq wawan karan Christopher Ramos Aymé, chunka pisqayuq watayullaraqmi karan, paypas wañuchikqa llanqamanta, paypaq llank’anan karan cementeriota pichaspa, chay cementierioqa aeropuerto ladoyanpi karan, chayhinapi Ayakuchu llaqtapi wañuchisqa kapuran.
K’uskiriykuna apakuchkan
Ministerio Públicoqa, kikin iskay chunka p’unchawta kicharin k’uskiriyta investigación nisqata ñañanchik Ruth Bárcena Loayza contranpi. Kay k’uskiriyqa presunto delito de violencia contra la autoridad sutichasqa kan, chaytataq churarimun, fiscal Brechman Muñoz Lapa. Yachasqanchikhinaqa, ñañanchikkuna Ruth Bárcena hinallataq Hilaria Aymeqa, sapa kutinmi justicia nisqata mañarikuspa, machkharispa puririnku imaraykuchus yawar ayllunkuna chunka pisqayuq p’unchaw qhapaq raymi killapi wañuchisqa kapuranku.
Qillqaq: Helen Quiñones